कोलम्बो — भारत र श्रीलङ्काबीचको समुद्री सहयोग र मैत्रीपूर्ण सम्बन्धलाई थप सुदृढ बनाउँदै भारतीय नौसेनाको जहाज आईएनएस शारदा श्रीलङ्काको कोलम्बो बन्दरगाहको सफल भ्रमण पूरा गरी फिर्ता भएको छ । यस भ्रमणका क्रममा दुवै देशका नौसेनाबीच आपसी समझदारी बढाउने र सम्बन्धलाई अझ प्रगाढ बनाउने उद्देश्यका साथ विभिन्न व्यावसायिक आदानप्रदान, तालिम सत्र तथा खेलकुद गतिविधिहरू सञ्चालन गरिएका थिए ।

क्षमता अभिवृद्धिका प्रयासहरू अन्तर्गत श्रीलङ्काली नौसेनाका कर्मचारीहरूलाई साना हतियार सञ्चालन, आधारभूत आगो नियन्त्रण, प्राथमिक उपचार र उद्धार प्रक्रियाका विषयमा तालिम समेत प्रदान गरिएको थियो । भ्रमणका क्रममा श्रीलङ्का नौसेनाको पश्चिमी नौसैनिक क्षेत्रका कमान्डर रियर एडमिरल जगथ कुमाराले आईएनएस शारदाको अवलोकन गर्दै जहाजका चालक दलका सदस्यहरूसँग अन्तरक्रिया गरेका थिए ।

सो अवसरमा उनले दुई देशबीचको बलियो समुद्री साझेदारीलाई पुनः जोड दिए । त्यस्तै, दुवै नौसेनाका अधिकारीहरूबीच भएका मैत्रीपूर्ण खेलकुद प्रतियोगिता, व्यावसायिक भलाकुसारी र एकअर्काको जहाज निरीक्षण (क्रस-डेक भिजिट) ले आपसी समझदारी र भाइचारालाई अझ गहिरो बनाएको छ ।

बन्दरगाह भ्रमणकै सिलसिलामा आईएनएस शारदाका कमान्डिङ अफिसरले श्रीलङ्काका लागि भारतीय उच्चायुक्त सन्तोष झासँग शिष्टाचार भेटवार्ता समेत गरेका थिए ।