काठमाडौँ – फिफा विश्वकप फुटबलको अन्तिम ३२ को निर्णायक खेलअघि मेक्सिकन समर्थकले विपक्षी टोली इक्वेडोरका खेलाडीलाई रातभर सुत्न नदिन होटल बाहिर हर्कत गरेका छन् ।

मेक्सिको सिटीमा हुने खेलअगाडि मेक्सिकन प्रशंसकले इक्वेडोरका खेलाडी बसेको होटल बाहिर लाउडस्पिकर, हर्न र मोटरसाइकलको चर्को आवाज निकालेर उनीहरूको आराममा बाधा पुर्‍याएका हुन् । मेक्सिकोको राजधानी बाहिर रहेको एउटा महँगो क्षेत्र सान्ता फेस्थित ‘वेस्टिन होटल’ बाहिर मध्यरातदेखि बिहान सबेरैसम्म दर्जनौँ समर्थकले यस्तो चर्को कोलाहल मच्चाएका थिए ।

ल्याटिन अमेरिकी फुटबलमा विपक्षी टोली बसेको होटल बाहिर यस्तो हर्कत गर्नु एउटा पुरानो र विवादित परम्पराको रूपमा रहँदै आएको छ । सुरुमा आफ्ना घरेलु टोलीलाई समर्थन र हौसला दिन सुरु गरिएको यो शैली अचेल विपक्षी खेलाडीको निन्द्रा बिगारेर मानसिक दबाब दिने ‘मनोवैज्ञानिक हतियार’का रूपमा प्रयोग हुन थालेको छ ।

यस घटनाप्रति गम्भीर आपत्ति जनाउँदै इक्वेडोर फुटबल महासङ्घ (एफईएफ) ले विश्वकप खेलका आयोजकसमक्ष औपचारिक उजुरी दर्ता गराएको छ ।

महासङ्घले मंगलबार एक विज्ञप्ति जारी गर्दै भनेको छ, “यस्तो व्यवहार विश्वकपले बोक्ने ‘फेयर प्ले’ समानता र एकताको सिद्धान्तको पूर्ण रूपमा विपरीत छ । एफईएफ सम्बन्धित निकायहरूलाई यस्ता घटनामा विशेष ध्यान दिन र हाम्रा खेलाडी, प्रशिक्षक तथा समर्थकको सुरक्षा सुनिश्चित गर्न आवश्यक कदम चाल्न आग्रह गर्दछ ।”