काठमाडौं – विश्व फुटबलको महाशक्ति ब्राजिलसँगको नकआउट भिडन्तअघि जापानले आफू पहिलेभन्दा धेरै परिपक्व र प्रतिस्पर्धी बनेको दाबी गरेको छ। विश्वकपको अन्तिम ३२ मा हुने बहुप्रतीक्षित खेलअघि जापानी टोलीले यसपटक इतिहास बदल्ने विश्वास व्यक्त गरेको हो।

जापानका मुख्य प्रशिक्षक प्रशिक्षक हाजिमे मोरियासुले विगतमा ब्राजिल जापानका लागि निकै कठिन प्रतिद्वन्द्वी भए पनि अहिले परिस्थिति फेरिएको बताएका छन्। उनका अनुसार पछिल्लो समय जापानले विश्व फुटबलका बलिया टोलीविरुद्ध उत्कृष्ट प्रदर्शन गर्दै आफ्नो स्तर उल्लेखनीय रूपमा उकासेको छ।

जापानले सन् २०२५ अक्टोबरमा भएको मैत्रीपूर्ण खेलमा २–० ले पछि परेको अवस्था उल्टाउँदै ब्राजिललाई ३–२ ले पराजित गरेको थियो। त्यस जितले टोलीको आत्मविश्वास बढाएको भए पनि विश्वकपको नकआउट चरण फरक चुनौती भएको प्रशिक्षक मोरियासुले स्वीकार गरेका छन्।

यता पाँच पटकको विश्वविजेता ब्राजिलका प्रशिक्षक कार्लो एन्सेलोटीले जापानलाई कमजोर रूपमा नलिन बताएका छन् । उनले आफ्नो टोली मानसिक खेलभन्दा पनि मैदानभित्रको प्रदर्शनमा केन्द्रित रहने बताएका छन्।

ब्राजिलले समूह चरणमा शीर्ष स्थान हासिल गर्दै नकआउट यात्रा तय गरेको हो भने जापान समूह एफको उपविजेताका रूपमा अन्तिम ३२ मा पुगेको हो। जापानले यसअघि विश्वकपमा कहिल्यै क्वार्टरफाइनल पुग्न सकेको छैन र यसपटक त्यो इतिहास बदल्ने लक्ष्य राखेको छ।

विश्वकप इतिहासमा ब्राजिल र जापानबीचको प्रतिस्पर्धामा ब्राजिलको स्पष्ट वर्चस्व रहे पनि पछिल्ला वर्षमा जापानी टोलीको निरन्तर सुधारले यस पटकको भेटलाई निकै रोचक बनाएको विश्लेषण गरिएको छ।