काठमाडौँ – फिफा विश्वकप २०२६ अन्तर्गत समूह ‘जे’ को आफ्नो अन्तिम खेलमा साविक विजेता अर्जेन्टिनाले जोर्डनको सामना गरिरहेको छ । टेक्ससको डल्लास स्टेडियममा जारी खेल अहिले चलिरहँदा दुवै टोलीबाट गोल हुन सकेको छैन र खेल ०–० को स्थितिमा छ ।

यसअघि नै लगातार दुई खेल जित्दै नकआउट चरण (अन्तिम ३२) मा स्थान पक्का गरिसकेको अर्जेन्टिनाले आजको खेलमा आफ्नो टोलीमा व्यापक परिवर्तन गरेको छ । मुख्य प्रशिक्षक लियोनेल स्कालोनीले हालसम्म विश्वकपमा अर्जेन्टिनाले गरेका सबै ५ गोल (अल्जेरिया विरुद्ध ह्याट्रिक र अस्ट्रिया विरुद्ध दुई गोल) गरेका कप्तान लियोनेल मेसीलाई सुरुआती ११ मा सामेल नगरी बेन्चमा राखेका छन् ।

भर्खरै ३९ वर्षमा प्रवेश गरेका मेसीको कार्यभार व्यवस्थापन गर्न र अन्य खेलाडीलाई अवसर दिन स्कालोनीले यो निर्णय लिएका हुन् । अर्जेन्टिनाले अन्तिम ३२ मा केप भर्डेको सामना गर्ने तय भइसकेको छ ।

विश्वकपमा पहिलो पटक डेब्यु गरेको जोर्डन यसअघिका दुवै खेल (अस्ट्रियासँग ३–१ र अल्जेरियासँग २–१) मा पराजित हुँदै प्रतियोगिताबाट बाहिरिइसकेको छ । प्रतिष्ठाको लडाइँ लडिरहेको जोर्डन बलियो अर्जेन्टिनालाई रोक्दै आफ्नो ऐतिहासिक विश्वकप यात्राको सुखद अन्त्य गर्ने योजनामा छ ।