काठमाडाैं – प्रयाङ्क भिडियो बनाउने बहानामा एक युवकमाथि दुर्व्यवहार गरेको आरोपमा प्रहरीले दुई जनालाई पक्राउ गरेको छ । सामाजिक सञ्जालमा भिडियो भाइरल भएपछि घटनाको अनुसन्धान अघि बढाइएको हो ।

प्रहरीका अनुसार ‘फलो नेपाल टाइम्स’ नामक इन्स्टाग्राम अकाउन्टमा पोस्ट गरिएको भिडियोमा मधेशी मूलका एक युवकलाई दुर्व्यवहार गरिएको देखिएको थियो । उक्त भिडियो सार्वजनिक भएपछि गृहमन्त्री सुधन गुरुङले सामाजिक सञ्जालमार्फत घटनामा संलग्नमाथि कडा कारबाही गर्न निर्देशन दिएका थिए ।

घटनामा संलग्न रहेको आरोपमा रुकुम पश्चिमको बाँफिकोट गाउँपालिका–३ का २८ वर्षीय डिल्लीबहादुर ओली र ३१ वर्षीय राजन केसीलाई शुक्रबार पक्राउ गरिएको जिल्ला प्रहरी कार्यालय रुकुम पश्चिमले जनाएको छ ।

पीडित ३१ वर्षीय युवक कपिलवस्तुको कृष्णनगर नगरपालिका–४ सिरसवा घर भई हाल रुकुम पश्चिममा बेकरी व्यवसाय सञ्चालन गर्दै आएका छन् । उनी सामान डेलिभरी गरेर फर्किने क्रममा मुसिकोट नगरपालिका–३ माछिमी क्षेत्रमा आरोपितहरूको सम्पर्कमा पुगेका थिए।

प्रहरीको प्रारम्भिक अनुसन्धानअनुसार आरोपितहरूले प्रयाङ्क भिडियो बनाउने भन्दै ती युवकलाई दुर्व्यवहार गरेका थिए । घटनाको भिडियो पछि विदेशमा रहेका जीवन ओलीलाई पठाइएको र उनले असार १० गते आफ्नो सामाजिक सञ्जालमार्फत सार्वजनिक गरेको खुलेको प्रहरीले जनाएको छ ।