काठमाडौं- अर्जेन्टिनी फुटबल सुपरस्टार लियोनेल मेस्सीको सम्मानमा अर्जेन्टिनाको पाटागोनिया क्षेत्रस्थित कट्राल को सहरमा ८५ फिट (२६ मिटर) अग्लो विशाल प्रतिमा अनावरण गरिएको छ। यो हालसम्म निर्माण गरिएको मेसीको सबैभन्दा ठूलो प्रतिमा पनि हो।

बुधबार ३९ वर्ष पुगेका मेसीले विश्वकपमा थप इतिहास रचेको केही दिनपछि उक्त प्रतिमा सार्वजनिक गरिएको हो। स्थानीय कलाकार आल्डो बेरोइसा नेतृत्वको टोलीले १८ महिनाको मिहिनेतपछि बनाएको प्रतिमामा करिब ७० टन स्टिल प्रयोग गरिएको छ।

प्रतिमाले सन् २०२२ को कतार विश्वकप फाइनलमा अर्जेन्टिनाले फ्रान्सलाई हराएर विश्वविजेता बनेपछि मेसीले घुँडा टेकेर गरेको प्रसिद्ध उत्सवको दृश्यलाई चित्रण गरेको छ।

प्रतिमामा मेसीले एक हातले अर्जेन्टिनाको जर्सी समातेर अर्को हातले आकाशतर्फ औँला देखाएको मुद्रा समावेश गरिएको छ, जुन उनले प्रायः गोल गरेपछि आफ्नो दिवंगत हजुरआमाको सम्झनामा गर्ने गर्थे।

कट्राल को तेल उत्पादनका लागि परिचित सानो शहर भए पनि प्रतिमा उद्घाटनपछि यहाँ पर्यटक तथा फुटबल समर्थकको आगमन बढेको छ।

यसअघि गत डिसेम्बरमा भारतको पश्चिम बंगाल राज्यको कोलकातामा मेसीको ७० फिट (२१.३ मिटर) अग्लो प्रतिमा निर्माण गरिएको थियो।

त्यसबेला यसलाई विश्वकै सबैभन्दा ठूलो फुटबल खेलाडीको प्रतिमा भनिएको थियो। तर, प्रतिमा हावा चल्दा हल्लिन थालेपछि स्थानीय प्रशासनले सुरक्षाको कारण देखाउँदै हटाउने निर्णय गरेको थियो।

यता अर्जेन्टिनामा मेसीप्रतिको सम्मान भने प्रतिमामै सीमित छैन। राजधानी ब्युनस आयर्यस नजिकैको एक क्षेत्रमा मेसीको विशाल भित्तेचित्र पनि तयार गरिएको छ। करिब १,३०० समर्थकले आफ्नो नाम लेखेर उक्त कलाकृतिमा सहभागिता जनाएका छन्।

कलाकार लियोनेल गार्सियाले १८ दिन लगाएर तयार पारेको उक्त भित्तेचित्रले मेसीले अर्जेन्टिनी समाजलाई एकताबद्ध बनाउने प्रतीकका रूपमा काम गरेको बताएका छन्। मेस्सीले पनि भिडियो सन्देशमार्फत समर्थक र कलाकारलाई धन्यवाद दिएका छन्।