काठमाडौँ – दक्षिण कोरियामाथि १–० को रोमाञ्चक जित निकाल्दै दक्षिण अफ्रिका विश्वकप फुटबल प्रतियोगिताको नकआउट चरण (अन्तिम ३२) मा प्रवेश गरेको छ ।

एस्टाडियो मोन्टेरे स्टेडियममा भएको समूह चरणको अन्तिम खेलमा जित निकालेसँगै दक्षिण अफ्रिका समूहको उपविजेता बन्न सफल भयो ।

खेल सकिएलगत्तै दक्षिण अफ्रिकी खेलाडी र समर्थक मैदानमा निकै उत्साहका साथ खुसीयालीमा झुमेका थिए ।

यस समूहबाट मेक्सिकोले यसअघि नै लगातार जित निकाल्दै समूह विजेताका रूपमा आफ्नो स्थान सुरक्षित गरिसकेको छ । अर्को खेलमा मेक्सिकोले मेक्सिको सिटी स्टेडियममा चेक गणतन्त्रको सामना गरेको थियो । मेक्सिको शीर्ष स्थानमा रहे पनि समूहको दोस्रो स्थान (उपविजेता) का लागि बाँकी टोलीबीच निकै प्रतिस्पर्धात्मक भिडन्त भएको थियो । यो खेलमा दक्षिण कोरियालाई पन्छाउँदै दक्षिण अफ्रिकाले बाजी मारेको हो ।