काठमाडौं – जितु नेपाल ‘मुन्द्रे’ले निर्माण र अभिनय गरेको ‘आई एम जितबहादुर’ बक्स अफिसमा फ्लप भएपछि अर्को फिल्मको प्रदर्शन मिति दुई महिनापछिलाई सारिएको छ ।

छैटौं दिनमा प्रदर्शनरत जितुको फिल्मले ४० लाख पनि ग्रस कलेक्सन गर्न सकेको छैन । सोहीकारण उनी दर्शकले फिल्मलाई माया नगरेकाले सिंगो क्षेत्र धरासायी बन्ने जोखिम बढेको बताउँदै आएका छन् ।

आफ्नो फिल्म हेर्न एकदमै कम दर्शक आएको विषयलाई उनले घरेलु फिल्मप्रति दर्शकको वास्ता नै नरहेकोरुपमा चर्चा गरेका हुन् ।

उनको फिल्म फ्लप भएको ताजा अवस्थामा साउन १ लाई प्रदर्शन मिति तोकिएको जितु शीर्ष भूमिकामा रहेको ‘कार्की साइँला’ पछि सरेको छ । दुई महिना पछि सरेको यस फिल्मको नयाँ प्रदर्शन मिति असोज २ लाई तोकिएको छ ।

यस फिल्मको प्रदर्शन मिति हेरफेर हुनुलाई बक्स अफिसमा जितु लगातार फ्लप भएको कोणबाट पनि चर्चा गर्न सकिन्छ । निर्माण पक्षले प्रदर्शन मिति परिवर्तनबारे ठोस कारण पनि देखाएको छैन ।

यो फिल्ममा जितु र नायिका प्रियना आचार्य शीर्ष भूमिकामा छन् । राजेन्द्र बस्नेतको निर्देशनमा यो फिल्मको छायाङ्कन भइसकेको छ ।

दुई महिनापछि सर्दा पनि यो फिल्म ‘झिँगे दाउ’सँग बक्स अफिस प्रतिस्पर्धा गर्ने भएको छ ।