काठमाडौं । राष्ट्रिय स्वतन्त्र पार्टी (रास्वपा)ले ‘विकास कूटनीति र वैश्विक मञ्चमा जीवन्त उपस्थिति’लाई आफ्नो परराष्ट्र नीतिको मूल आधार बनाउने भएको छ ।

रास्वपाको चितवनको भरतपुरमा चलिरहेको पहिलो महाधिवेशनको बन्दसत्रमा सभापति रवि लामिछानेले मंगलबार राजनीतिक प्रतिवेदन प्रस्तुत गर्दै यस्तो बताएका हुन् ।

‘रास्वपाले परम्परागत शक्ति केन्द्रित कूटनीतिभन्दा ‘विकास कूटनीति’लाई परराष्ट्र नीतिको केन्द्रमा स्थापित गर्ने लक्ष्य राखेको छ,’ लामिछानेको प्रतिवेदनमा भनिएको छ ।

दुई छिमेकी भारत र चीनलाई अवसरका रूपमा उपयोग गर्नुपर्ने उनले जनाएका छन् । रास्वपाले नेपाललाई प्रतिस्पर्धी प्रभाव क्षेत्रको निष्क्रिय मैदान नभई दक्षिण एसिया र हिमालय क्षेत्रलाई जोड्ने आर्थिक, सांस्कृतिक, व्यापारिक तथा मानवीय सम्पर्कको ‘जीवन्त पुल’का रूपमा विकास गर्ने दीर्घकालीन दृष्टिकोण राख्ने उनले स्पष्ट पारेका छन् ।