वाशिंटन- अमेरिकी राष्ट्रपति डोनाल्ड ट्रम्पले स्विट्जरल्यान्डमा भएको वार्तापछि इरानले सम्झौताको पालना नगरे वा उचित व्यवहार नदेखाए आफूहरू फेरि कारबाही गर्न तयार रहेको बताएका छन्।

ट्रम्पले भने, ‘यदि इरान आफ्ना प्रतिबद्धतामा अडिग रहँदैन भने मैले जे गर्नुपर्छ, त्यही गर्नेछु।’

उनले इरानसँग आफू वा अमेरिकामाथि दबाब सिर्जना गर्ने कुनै प्रभावकारी क्षमता नरहेको पनि दाबी गरे। हालैका घटनापछि इरानको सैन्य तथा आर्थिक अवस्था निकै कमजोर बनेको उनको भनाइ थियो।

ट्रम्पले इरानलाई परमाणु हतियार प्राप्त गर्नबाट रोक्नु आफ्नो सबैभन्दा ठूलो प्राथमिकता रहेको दोहोर्‍याए।

लामो समयसम्म सैन्य कारबाही गर्नुपर्ने अवस्था आएर विश्व अर्थतन्त्रमा मन्दीको जोखिम सिर्जना भए पनि इरानलाई परमाणु हतियार हासिल गर्न नदिनु अझ महत्वपूर्ण विषय भएको उनको तर्क छ।