काठमाडौं- राष्ट्रिय स्वतन्त्र पार्टीका सभापति रवि लामिछानेले महाधिवेशनमा स्वस्थ प्रतिस्पर्धा हुनुपर्ने उल्लेख गरेका छन् । चितवनमा बसेको पार्टीको केन्द्रीय कमिटी बैठकलाई सम्बोधन गर्दै उनले पहिलो महाधिवेशनले पार्टी एकता गर्दै कुनै पनि व्यक्तिको अधिकारलाई कुण्ठित नगर्ने उल्लेख गरे ।

सभापति रविले लोकतान्त्रिक प्रक्रियामा भाग लिन पाउने सुविधा सबैलाई दिने बताउँदै लोकतान्त्रिक अधिकारको कुण्ठित भए दुर्घटना निम्त्याउने उल्लेख गरे । ‘अधिकार कुण्ठित भए दुर्घटना निम्त्याउँछ स्वस्थ प्रतिस्पर्धा गर्नुस्,’ रविले भने, ‘कुनै पनि प्यानल नबनाइकन एक्ला एक्लै लड्नुहोस् । विधानले तोकेको योग्यता पुगेका व्यक्तिहरूलाई लोकतान्त्रिक प्रक्रियामा भाग हुन छुट छ ।’

भोलिबाट चितवनमा हुन लागेको पार्टीको पहिलो महाधिवेशन चार वर्ष पछाडि हुन लागेको हो । पहिलो महाधिवेशन अगाडि बसेको अन्तिम पटकको केन्द्रीय कमिटी बैठकमा सभापति रवि लामिछाने भावुक हुँदै पार्टी दर्ता गर्ने बेलामा नागरिकताको समस्याले अड्किएको कुरा समेत सम्झिएका छन् ।

उनले चार वर्षको दौडानमा आफूलाई प्रहरीले हत्कडी लगाएर समातेको देखि सम्पूर्ण फेरिस्त केन्द्रीय कमिटी बैठकलाई सुनाए।