काठमाडौं– नेपाली कांग्रेसले सरकारका कामकारबाहीको प्रारम्भिक समीक्षा गर्दै सदनमार्फत सरकारका कमीकमजोरीबिरुद्ध सशक्त रूपमा खबरदारी गर्ने निर्णय गरेको छ।

शनिबार सिंहदरबारस्थित संसदीय दलको कार्यालयमा बसेको संसदीय दल कार्यसमितिको बैठकले सरकारको कार्यसम्पादनबारे छलफल गर्दै जनसरोकारका विषयलाई प्रभावकारी रूपमा उठाउने निष्कर्ष निकालेको हो।

बैठकपछि सञ्चारकर्मीसँग कुरा गर्दै कांग्रेस महामन्त्री प्रदीप पौडेलले राष्ट्रिय मुद्दा तथा जनजिविकासँग सम्बन्धित विषयलाई सशक्त रूपमा संसद्मा उठाउन संसदीय दल र पार्टीबीच समन्वय गर्ने विषयमा छलफल भएको जानकारी दिए।

उनले प्रमुख प्रतिपक्षी दलले निरन्तर रूपमा आफ्ना विषय सदनमा उठाइरहे पनि सरकारले त्यसलाई गम्भीरतापूर्वक नलिएको आरोप लगाउँदै सरकारमाथि निरन्तर खबरदारी जारी राखिने बताए।

महामन्त्री पौडेलले विभिन्न मन्त्रालयले गरेका कामको अध्ययन गर्न पार्टीका नेताहरूलाई जिम्मेवारीसमेत तोकिएको जानकारी दिँदै सरकारले कार्यकालको सय दिनमा उल्लेखनीय उपलब्धि हासिल गर्न नसकेको टिप्पणी गरे ।