काठमाडौं- राष्ट्रिय प्रजातन्त्र पार्टी (राप्रपा) का पूर्ववरिष्ठ नेता रवीन्द्र मिश्रले राष्ट्रिय स्वतन्त्र पार्टी (रास्वपा) का केही सांसदमा अत्यधिक अहंकार देखिएको टिप्पणी गरेका छन्।

सामाजिक सञ्जाल फेसबुकमार्फत प्रतिक्रिया दिँदै मिश्रले रास्वपाका कतिपय सांसदहरू ‘बालेन शाहको लोकप्रियताको बलमा संसद्मा पुगेको’ दाबी गर्दै अनावश्यक घमण्ड नगर्न सुझाव दिएका हुन्।

उनले रास्वपाका एक सांसदले आफूलाई नभई बालेनलाई बधाई दिन आग्रह गरेको प्रसंग उल्लेख गर्दै त्यसलाई विनम्रताको उदाहरण भनेका छन्। तर अर्का एक सांसदले आफू ‘जनताको मन जितेर आएको’ बताएको प्रसंगलाई उनले अहंकारको रूपमा व्याख्या गरेका छन्।

मिश्रले पहिलो चरित्रमा विनयशीलता देखिएको तर दोस्रो प्रकारको व्यवहार बढी देखिएको उल्लेख गर्दै यस्तो प्रवृत्ति राम्रो नभएको बताएका छन्।

‘देख्दा, हेर्दा र सुन्दा जिउ नै गह्रौँ भएर यति लेखेँ। अहंकारीहरूलाई फाइदै होला,’ उनले फेसबुकमा लेखेका छन्।