काठमाडौं । पूर्वाधार विकास मन्त्री सुनिल लम्सालले विकास निर्माण कार्यमा देखिँदै आएको प्रमुख समस्या विद्युत् पोल व्यवस्थापन समाधानका लागि सम्बन्धित निकायबीच सहमति भएको बताएका छन्।

पूर्वाधार विकास मन्त्रालयमा आज आयोजित छलफलमा निर्माण व्यवसायी तथा सरोकारवाला निकायहरूको सहभागितामा विकास निर्माणमा अवरोध सिर्जना गर्ने विद्युत् पोल व्यवस्थापन सम्बन्धी विषयमा महत्वपूर्ण सहमति भएको हो।

छलफलका क्रममा आजदेखि कुनै पनि विकास निर्माण कार्य विद्युत् पोल नसारिएको कारणले अवरुद्ध हुन नदिने प्रतिबद्धता व्यक्त गरिएको मन्त्री लम्सालले जानकारी दिए।

उनका अनुसार आगामी दिनहरूमा निर्माण कार्य सुरु हुनुअघि नै आवश्यक सबै विद्युत् पोलहरू स्थानान्तरण गरिसक्ने व्यवस्था मिलाइनेछ। यसका लागि सम्बन्धित निकाय तथा निर्माण व्यवसायी पक्षले मन्त्रालयसमक्ष स्पष्ट प्रतिबद्धता जनाएका छन्।

यस सहमतिसँगै अब विकास निर्माणका कामहरूमा ढिलाइ कम हुने र परियोजनाहरू समयमै सम्पन्न हुने अपेक्षा गरिएको मन्त्रालयले जनाएको छ।