काठमाडौँ– खानाको व्यवस्था नभएपछि कीर्तिपुरस्थित राधास्वामी क्षेत्रमा रहेको सुकुमवासी होल्डिङ सेन्टरमा आश्रित परिवारहरू आन्दोलनमा उत्रिएका छन् । विद्यालय जाने केटाकेटीहरू समेत खानाको व्यवस्था नभएपछि विद्यालय जानबाट रोकिएको उनीहरुको भनाइ छ ।

काठमाडौँ उपत्यकाका नदी किनारका बस्ती हटाइएपछि छानविन गरी उचित व्यवस्थापन गर्ने सरकारी प्रतिवद्धतासहित अस्थायी रूपमा १५ दिनका लागि राधास्वामी आश्रम ट्रष्ट परिसरमा टेन्टमा राखिएका ६५ घरधुरीका २ सय ७७ जना दुई महिना बितिसक्दा पनि स्थायी व्यवस्थापनको पर्खाइमा छन् ।

आश्रितहरूका अनुसार सुरुका दिनमा राधास्वामी सत्संगले उनीहरूको खानपानको व्यवस्था गर्दै आएको थियो । पछि उनीहरूको सम्पूर्ण जिम्मेवारी काठमाडौँ महानगरपालिकाले लिएको थियो । तर महानगरले आइतबारदेखि खाना वितरण बन्द गरेपछि उनीहरू समस्यामा परेका छन् ।

खाना बन्द भएसँगै दैनिक गुजारा चलाउन कठिन भएको भन्दै आश्रितहरूले तत्काल खाद्यान्न तथा बसोबासको उचित व्यवस्था गर्न सरकार र महानगरपालिकासँग माग गरेका छन् । आश्रित परिवारहरूले अस्थायी बसोबासको अवधि लामो हुँदा बालबालिका, ज्येष्ठ नागरिक तथा अन्य सदस्यहरू थप समस्यामा परेको बताएका छन् ।

आइतबार साँझदेखि खाना दिएको छैन । विद्यालय जाने केटाकेटीहरू समेत खानाको व्यवस्था नभएपछि विद्यालय जानबाट रोकिएको एक आश्रितले बताए । 
उनीहरूले सरकारले गरेको व्यवस्थापनको प्रतिबद्धता कार्यान्वयन गर्न र दीर्घकालीन समाधान निकाल्न सम्बन्धित निकायको ध्यानाकर्षण गराएका छन् ।

‘हामीलाई जिम्मेवारी दिँदा खाना, खाजा लगायतको राम्रै व्यवस्था गरेका थियौँ । महानगरले आफैँ गर्छौँ भनेपछि स्वयंसेवक राख्न पनि छोडिएको छ’, सत्संगका एक स्वयंसेवकले बताए ।