काठमाडौं- बंगलादेशमा इसाई अल्पसंख्यक समुदायमाथि भएको अहिलेसम्मकै ठूलो र भयानक आतंकवादी हमलाको २५ वर्ष पूरा भएको छ । यसै सन्दर्भमा क्याथोलिक धर्मावलम्बीहरूले विशेष प्रार्थना सभाको आयोजना गर्दै न्यायका लागि पुनः आवाज उठाएका छन् ।

गत जुन ३ तारिखका दिन गोपालगञ्ज जिल्लाको बानियाचारस्थित ‘मस्ट होली रिडिमर क्याथोलिक चर्च’ मा विशेष स्मृति सभा आयोजना गरिएको थियो । उक्त सभामा सहभागी क्याथोलिकहरूले मृतकहरूको सम्झनामा श्रद्धाञ्जली अर्पण गरेका थिए ।

स्थानीय पादरी फादर डेभिड घारामीले प्रार्थना सभापछि सबैजना चिहानमा पुगेर मृतकहरूको त्यागको सम्मान गरेको जानकारी दिए। यो घटना भएको २५ वर्ष बितिसक्दा पनि पीडित परिवारले न्याय पाउन सकेका छैनन्, जसका कारण स्थानीय समुदायमा अझै पनि निराशा र आक्रोश व्याप्त छ।

पादरी घारामीले आफ्नो सन्देश न्यायमा मात्र सीमित नरहेको बताउँदै समाजमा सहनशीलता, सम्मान र करुणा हुनुपर्नेमा जोड दिए । उनले सबै प्रकारका हिंसा र कट्टरपन्थको निन्दा गर्दै शान्ति र सद्भावका साथ जिउन पाउनुपर्ने माग गरे ।

सन् २००१ जुन ३ का दिन आइतबारको प्रार्थना भइरहेका बेला खचाखच भरिएको उक्त चर्चमा बम विष्फोट भएको थियो । सो विष्फोटमा १० जना क्याथोलिकको ज्यान गएको थियो भने करिब ५० जना घाइते भएका थिए ।

उक्त आक्रमणको जिम्मेवारी हरकत-उल-जिहाद (हुजी) नामक प्रतिबन्धित इस्लामिक आतंकवादी समूहले लिएको थियो । चर्चमा भएको यस विष्फोटको अनुसन्धान भने लामो समयदेखि रोकिएको छ । अनुसन्धान अधिकारीहरू बारम्बार परिवर्तन भइरहँदा मुद्दाको प्रगति सुस्त बनेको हो ।