काठमाडौं- संयुक्त राष्ट्रसंघले पाकिस्तानमा धार्मिक अल्पसंख्यक समुदायमाथि भइरहेको उत्पीडन र हिंसाप्रति पुनः गम्भीर चिन्ता व्यक्त गरेको छ । केही वर्षअघि राष्ट्रसंघका विशेषज्ञहरूले त्यहाँका सीमान्तकृत समुदायको अवस्थाबारे अनुसन्धान गरेका थिए । तर सन् २०२६ मा आइपुग्दा पनि ती गम्भीर समस्याहरू कायमै छन् ।

पाकिस्तानमा खासगरी इसाई, हिन्दु र शिख समुदायका बालिका तथा महिलाहरूलाई मुस्लिम पुरुषहरूद्वारा जबरजस्ती धर्म परिवर्तन गराउने र विवाह गर्ने प्रवृत्ति रहेको जनाइएको छ । यसका साथै अहमदिया जस्ता अल्पसंख्यक मुस्लिम समुदायहरूले पनि राज्यस्तरबाटै व्यवस्थित धार्मिक भेदभाव र उत्पीडनको सामना गरिरहेका छन् ।

पाकिस्तान विगत धेरै दशकदेखि मानव अधिकार उल्लंघनका विभिन्न घटनाहरूका कारण अन्तर्राष्ट्रिय निकायहरूको आलोचनाको केन्द्रमा रहँदै आएको छ । त्यहाँ बालबालिकाको बेचबिखन र यौन शोषण, महिलामाथि हुने हिंसा, ईशनिन्दा कानुनको दुरुपयोग, धार्मिक अल्पसंख्यकहरूको उत्पीडन र गरिब नागरिकहरूलाई चक्रव्यूहमा फसाउने बन्धक श्रमजस्ता आधुनिक दासताका रूपहरू व्याप्त छन् ।

केही वर्षअघि संयुक्त राष्ट्रसंघीय मानव अधिकार उच्चायुक्तले पाकिस्तानमा अन्तर्राष्ट्रिय मानव अधिकार कानुनको उल्लंघन गर्दै सानै उमेरका बालिकाहरूलाई परिवारबाट अपहरण गरी टाढा पुर्‍याइने, आफूभन्दा दोब्बर उमेरका पुरुषसँग विवाह गर्न र इस्लाम धर्म परिवर्तन गर्न बाध्य पारिने गरेको जनाएका थिए । यस्तो कार्यमा धार्मिक संस्थाहरू, न्याय प्रणालीका केही पक्षहरू र सुरक्षा निकायहरूको पनि मिलेमतो रहने गरेको जनाइएको छ ।