काठमाडौं- भारतले रुससँग मिलेर संयुक्त रूपमा विकास गरेको ब्रह्मोस मिसाइल भियतनामलाई आपूर्ति गर्ने गरी एक महत्वपूर्ण सम्झौता गरेको छ । भारतका रक्षा सचिव राजेशकुमार सिंहले यसबारे जानकारी दिँदै इन्डोनेसियासँग पनि यस्तै प्रकारको मिसाइल सम्झौताको तयारी अन्तिम चरणमा पुगेको बताएका छन् ।

सिङ्गापुरमा आयोजित ‘शाङ्ग्रिला डायलग’ सुरक्षा सम्मेलनमा बोल्दै उनले दक्षिणपूर्वी एसियाली राष्ट्रहरूको सङ्गठन (आसियान) का देशहरूप्रति भारतको बलियो प्रतिबद्धता रहेको स्पष्ट पारे। यद्यपि उनले यी सम्झौताहरूका बारेमा थप विस्तृत विवरण भने खुलाएका छैनन् ।

भारतले पछिल्लो समय आफ्नै देशमा रक्षा सामग्रीहरूको उत्पादन बढाउँदै लगेको छ । आन्तरिक आवश्यकता पूरा गर्नुका साथै निर्यातलाई समेत प्रवर्द्धन गर्ने उद्देश्य राखेको भारतले यसअघि नै फिलिपिन्सलाई यो सुपरसोनिक क्रुज मिसाइल बिक्री गरिसकेको छ ।

भियतनामसँग भएको यो नयाँ सम्झौता तालिम र लजिस्टिक सहयोगसहित करिब ६० अर्ब भारतीय रुपैयाँ (६२ करोड ९० लाख अमेरिकी डलर) बराबरको हुन सक्ने अनुमान गरिएको छ । रक्षा क्षेत्रमा भारतले चालेको यो कदमलाई यस क्षेत्रको रणनीतिक साझेदारी बढाउने प्रयासका रूपमा हेरिएको छ।