काठमाडौं- फिफा विश्वकप २०२६ को समूह ‘बी’ अन्तर्गत सन फ्रान्सिस्कोस्थित लिभाइज स्टेडियममा भएको आफ्नो पहिलो खेलमा कतार र स्विट्जरल्याण्डले १-१ गोलको रोमाञ्चक बराबरी खेलेका छन् । यससँगै आफ्नो फुटबल इतिहासमै कतारले विश्वकपमा पहिलो अंक जोड्न सफल भएको छ ।

खेलको अन्तिम समयमा कतारले गोल फर्काउँदै स्विट्जरल्याण्डको हातबाट जित खोसेको हो । खेलको पहिलो हाफमा ब्रेल एम्बोलोले पेनाल्टीमार्फत गोल गर्दै स्विट्जरल्याण्डलाई सुरुवाती अग्रता दिलाएका थिए । खेलको १३औँ मिनेटमा स्विट्जरल्याण्डका रेमो फ्रुइलरलाई कतारी गोलकिपर महमुद अबुनादाले डिबक्सभित्र लडाएपछि रेफ्रीले पेनाल्टी दिएका थिए । भिडियो असिस्टेन्ट रेफ्री (भीएआर) को लामो जाँचपछि एम्बोलोले पेनाल्टीलाई सहजै गोलमा परिणत गरे ।

यसअघि कतारले खेलको सुरुवातमै गोल गर्ने राम्रो अवसर पाएको थियो । कतारका एडमिल्सन जुनियरले स्विट्जरल्याण्डका डिफेन्डर म्यानुएल अकान्जीबाट बल खोसेर गोलतर्फ प्रहार गरे पनि स्विस गोलकिपर ग्रेगोर कोबेलले रोक्न सफल भए । पहिलो हाफकै इन्जुरी समयमा स्विट्जरल्याण्डका मिशेल एबिसरको प्रहारलाई कतारी खेलाडीले गोललाइनबाट बचाएका थिए ।

दोस्रो हाफमा अत्यधिक गर्मीका कारण खेलको गति केही सुस्त सुनिएको थियो । खेल सकिन १५ मिनेट बाँकी छँदा स्विट्जरल्याण्डले गोल गर्ने केही अवसरहरू गुमायो । कतारका प्रशिक्षक जुलियन लोपेटेगुईको रणनीति अनुसार खेलिरहेको कतारी टोलीले खेलको अन्तिम समयमा चमत्कार गर्‍यो ।

खेलको अन्तिम मिनेटमा होमाम अल अमिनको उत्कृष्ट क्रसमा कतारका कप्तान बुआलेम खुखीले उत्कृष्ट हेडिङ गर्दै बललाई जाली चुमाए । यद्यपि, फिफाले पछि उक्त गोललाई स्विट्जरल्याण्डका मिरो मुहेइमको आत्मघाती गोलको रूपमा मान्यता दिएको छ । यस बराबरीसँगै सन् २०२२ को विश्वकप आयोजक कतारले यस पटकको विश्वकपमा महत्त्वपूर्ण अंक जोडेको छ ।