रुपन्देही- बुटवलस्थित एक सुनचाँदी पसलबाट करिब डेढ करोड रुपैयाँ बराबरका गरगहना चोरी भएको भन्दै झुटो उजुरी दिने पसल सञ्चालक र उनका कामदार पक्राउ परेका छन्।

जिल्ला रुपन्देहीको बुटवल उपमहानगरपालिका–४ अमरपथस्थित तिनाउ सुनचाँदी पसलका सञ्चालक ४१ वर्षीय दिपक विक र सोही पसलका ४७ वर्षीय कामदार नवीन विकलाई प्रहरीले पक्राउ गरेको हो।

प्रहरीका अनुसार उनीहरूले जेठ १७ गते बिहान १२ः१० बजे पसलको सटरको ताला तोडी सेफभित्र रहेको एक करोड ४६ लाख ९४ हजार ७ सय रुपैयाँ बराबरको सुनचाँदीका गरगहना चोरी भएको भन्दै उजुरी दिएका थिए।

घटनाको अनुसन्धानका क्रममा लुम्बिनी प्रदेश प्रहरी कार्यालय, नेपाल प्रहरी प्रदेश कार्यालय लुम्बिनी, जिल्ला प्रहरी कार्यालय रुपन्देही तथा इलाका प्रहरी कार्यालय बुटवलको संयुक्त टोलीले उक्त चोरी वास्तविक नभई योजनाबद्ध रूपमा गरिएको नाटक भएको निष्कर्ष निकालेको छ।

अनुसन्धानका क्रममा सञ्चालक दिपक विकको घरबाट ५ तोला ४.१ लाल तौलका सुनका गरगहना तथा १४ केजी ३०० ग्राम चाँदीका सिक्का, दाना र ढिक्का बरामद गरिएको प्रहरीले जनाएको छ ।