काठमाडौं- परराष्ट्रमन्त्री शिशिर खनाल भारतको औपचारिक भ्रमणका क्रममा आज नयाँ दिल्ली पुगेका छन् । भारतीय विदेशमन्त्री डा. एस जयशंकरको निमन्त्रणामा मन्त्री खनाल दिल्ली पुगेका हुन् ।

नयाँ दिल्लीस्थित इन्दिरा गान्धी अन्तर्राष्ट्रिय विमानस्थलमा ओर्लिएका परराष्ट्रमन्त्री खनाललाई भारतका लागि नेपाली कार्यवाहक राजदूत डा. सुरेन्द्र थापा र भारतीय विदेश मन्त्रालयका अतिरिक्त सचिव मुनु महावरले स्वागत गरेका थिए ।

भ्रमणका क्रममा मन्त्री खनालले आफ्ना भारतीय समकक्षी डा. जयशंकरसँग द्विपक्षीय वार्ता गर्नुका साथै अन्य उच्चस्तरीय भेटघाटहरूमा सहभागिता जनाउने कार्यक्रम रहेको छ ।

यस भ्रमणले नेपाल र भारतबीचको द्विपक्षीय सम्बन्धलाई थप सुदृढ बनाउनुका साथै आपसी सहयोगका क्षेत्रहरूलाई अझ फराकिलो बनाउने अपेक्षा गरिएको छ ।