काठमाडौं – पूर्वप्रधानमन्त्री डा. बाबुराम भट्टराईले नयाँ सरकार बनेको सय दिन पनि नपुग्दै देशको राजनीति फेरि पुरानै विवाद र अवरोधतर्फ उन्मुख भएको भन्दै चिन्ता व्यक्त गरेका छन् ।

सामाजिक सञ्जालमार्फत आफ्नो धारणा सार्वजनिक गर्दै भट्टराईले नयाँ पार्टीको नेतृत्वमा सरकार गठन भएको छोटो समयमै संसद् अवरुद्ध हुने, राजनीतिक दन्तबझान बढ्ने र जनताका आधारभूत एजेन्डा ओझेलमा पर्ने संकेत देखिनु विडम्बनापूर्ण भएको बताएका छन् ।

उनले अब कसैलाई पनि पुरानै अस्थिरताको राजनीति दोहोर्‍याउने र देशलाई गरिबी तथा बेरोजगारीको दुष्चक्रमा अल्झाइराख्ने छुट नरहेको उल्लेख गरेका छन् । सरकारका कमजोरी र त्रुटिको आलोचना गर्नुपर्ने भए पनि उसलाई पूरा कार्यकाल काम गर्ने अवसर दिनुपर्ने उनको धारणा छ ।

भट्टराईले लोकतान्त्रिक व्यवस्थामा सरकारको मूल्याङ्कन गर्ने अधिकार अन्ततः जनतासँग रहने भन्दै सरकारले अपेक्षाअनुसार काम गर्न नसके आगामी निर्वाचनमार्फत जनताले दण्डित गर्न सक्ने बताएका छन् ।