लेबनान- दक्षिणी लेबनानमा संयुक्त राष्ट्र (युएन) का एकजना शान्ति सैनिकको मृत्यु भएको छ। लेबनानको रक्षा मन्त्रालयले मृतक सैनिक सर्बियाका नागरिक भएको पुष्टि गरेको छ।

मन्त्रालयका अनुसार युएनको एक बेसमा भएको आक्रमणमा ती सैनिक घाइते भएका थिए। घाइते भएपछि उनलाई बेसभित्र रहेको अस्पतालमा तत्काल उपचार दिइएको थियो।

रक्षा मन्त्रालयले जनाएको अनुसार वरिष्ठ सार्जेन्ट मिलोवान योवानोभिचलाई पछि हेलिकप्टरमार्फत बेरुतस्थित युनिभर्सिटी मेडिकल सेन्टर लगिएको थियो, जहाँ उपचारका क्रममा उनको मृत्यु भएको हो।

हिजबुल्लाहको माग : इजरायली सेना पछाडि हटोस्

इरानको सैन्य संस्था आईआरजीसी अन्तर्गत कुद्स फोर्सका कमाण्डर इस्माइल कानीले हिजबुल्लाहले इजरायली सेनालाई लेबनानका ती क्षेत्रबाट फिर्ता हुन माग गरेको बताएका छन् । जहाँ हालको संघर्षका क्रममा इजरायली सेना पुगेको छ।

उनका अनुसार मागमा इजरायल युद्ध सुरु हुनुअघिको अवस्थामै फर्किनुपर्ने उल्लेख छ।

कानीले लेबनानमा रहेको इजरायली सेनाविरुद्ध हिजबुल्लाहलाई समर्थन गर्नु सबै मुस्लिमहरूको जिम्मेवारी रहेको बताए। यसका साथै उनले इजरायललाई क्षेत्रबाट हटाउने लक्ष्य हासिल गर्न सकिने दाबी गरेका छन्।