काठमाडौं- प्युठानको गौमुखी गाउँपालिकामा गोरुलाई निर्दयी व्यवहार गरेको भिडियो सामाजिक सञ्जालमा सार्वजनिक भएपछि प्रहरीले एक व्यक्तिलाई नियन्त्रणमा लिएको छ । जिल्ला प्रहरी कार्यालय प्युठानका अनुसार गौमुखी गाउँपालिका वडा नं. १ बस्ने अन्दाजी ३६ वर्षका जालिराम थापा मगरलाई पशुपन्छी प्रति निर्दयी व्यवहार गरेको अभियोगमा पक्राउ गरिएको हो ।

विगत ४/५ दिन अगाडि देखि फेसबुक र टिकटकजस्ता सामाजिक सञ्जालमा थापा मगरले आफ्नै खेतबारीमा गोरु जोतिरहेको अवस्थामा गोरु हिँड्न नसकी खेतमा बसेपछि उक्त गोरुको नाक र मुख माटोमा गाडिदिएको तथा कुटपिट गरेको भिडियो चर्चामा आएको थियो । गोरुलाई निर्दयी व्यवहार गरी भिडियो बनाएर सामाजिक सञ्जालमा पोस्ट गरेपछि प्रहरीले उनलाई निगरानीमा राखेको थियो ।

पशुपन्छी प्रति यस्तो क्रूर व्यवहार गरेको पाइएपछि जिल्ला प्रहरी कार्यालय प्युठानले निज थापा मगरलाई नियन्त्रणमा लिई मुलुकी अपराध संहिता २०७४ को परिच्छेद २७ को दफा २९० बमोजिम पशुपन्छी प्रति निर्दयी व्यवहार गर्न नहुने कसुरमा मुद्दा दर्ता गरेको छ । घटनाको थप अनुसन्धानका लागि जिल्ला प्रशासन कार्यालय प्युठानबाट पाँच दिनको म्याद थप गरी आवश्यक कानुनी प्रक्रिया अगाडि बढाइएको सूचना अधिकारी एवं प्रहरी निरीक्षक हरि भट्टराईले जानकारी दिएका छन् ।