काठमाडौं- एशियाली खेलकुदको छनौट प्रतियोगितामा नेपालले मलेशियालाई १६७ रनको विशाल अन्तरले पराजित गरेको छ । बिहीबार भएको खेलमा नेपालले दिएको २ सय ७६ रनको विशाल लक्ष्य पछ्याएको निर्धारित २० ओभरमा ९ विकेट गुमाउँदै १ सय ८ रनमा समेटियो ।

मलेशियाका लागि कप्तान सइद अजीजले ४५ बलमा ५४ रन बनाए । त्यस्तै, शरविन मुनियान्दीले १८ र मुहम्मद हजिक अइमानले १३ रन बनाउनुबाहेक अरु कसैले दोहोरो अंकमा स्कोर बनाउन सकेनन् ।

नेपालका लागि शेर मल्लले ३ तथा कुशल मल्ल, दीपेन्द्रसिंह ऐरी, सन्दीप लामिछाने, सोमपाल कामी र करण केसीले समान एक विकेट लिए ।

त्यअघि टस जितेर मलेशियाले पहिले फिल्डिङ रोजेपछि ब्याटिङमा उत्रिएको नेपालले निर्धारित २० ओभरमा ७ विकेट गुमाउँदै २ सय ७५ रन बनायो ।

नेपालका लागि कुशल भुर्तेलले ५४ बलमा १ सय २६ रन बनाए । यस क्रममा उनले १४ चौका र ८ छक्का प्रहार गरे । त्यस्तै, आशिफ शेखले २४ बलमा ६८ रन बनाए । कप्तान दीपेन्द्रसिंह ऐरीले ११ बलमा ३१ रन बनाए ।

बलिङतर्फ विरानदीप सिंहले तीन तथा सइन अजीज र विजय उन्नीले समान दुई विकेट लिए ।