झापा- झापाको दमकस्थित रतुवा खोलाको पुलमुनि बोराभित्र बाँधिएको अवस्थामा मृत भेटिएकी युवतीको पहिचान खुलेको छ।

जिल्ला प्रहरी कार्यालय झापाका अनुसार मृतक युवती दमक नगरपालिका-८, वसन्तटोल निवासी नारायण तिवारीकी २१ वर्षीया छोरी रमा तिवारी (रोमा) रहेको खुलेको छ।

बुवा नारायण र आमा मुना तिवारीले शव हेरेपछि छोरीका रुपमा सनाखत गरेका हुन् । यस घटनाबारे थप अनुसन्धान भइरहेको प्रहरीले जनाएको छ ।

प्रहरीका अनुसार रमा गत जेठ १३ गते राति करिब साढे ९ बजे घरबाट आफैँ निस्किएकी थिइन्। त्यसपछि उनी घर फर्किएकी थिइनन् ।

यसअघि शनिबार बिहान दमक नगरपालिका-१० सेतुमारीस्थित पुलमुनि रतुवा खोलामा उनको शव फेला परेको थियो। स्थानीयबासीले शव देखेपछि प्रहरीलाई खबर गरेका थिए।