काठमाडौं- म्यान्मारका राष्ट्रपति मिन आङ ह्लाइङ मे ३० देखि जुन ३ सम्म भारतको औपचारिक भ्रमणमा जाने भएका छन् । म्यान्मारको सत्ता सम्हालेपछि उनको यो पहिलो विदेश भ्रमण हुन सक्ने भारतीय विदेश मन्त्रालयले बिहीबार जानकारी दिएको छ ।

आफ्नो भारत भ्रमणका क्रममा राष्ट्रपति ह्लाइङले जुन १ नयाँ दिल्लीमा भारतीय प्रधानमन्त्री नरेन्द्र मोदीसँग दुई पक्षीय वार्ता गर्ने कार्यक्रम रहेको छ । सैन्य विद्रोह गरेर सत्ता कब्जा गरेको पाँच वर्षपछि गत अप्रिल ३ मात्र उनी म्यान्मारको संसदबाट राष्ट्रपतिमा निर्वाचित भएका थिए ।

राष्ट्रपति ह्लाइङ सुरुमा अन्तर्राष्ट्रिय बिग क्याट एलायन्स (आइबिसीए) सम्मेलनमा भाग लिन भारत जाने तय भएको थियो । तर उक्त सम्मेलन स्थगित भएपछि उनको यो भ्रमणलाई औपचारिक भ्रमणमा परिणत गरिएको भारतीय विदेश मन्त्रालयले जनाएको छ ।