काठमाडौं- पाकिस्तानको हरिपुरस्थित जीटी रोडमा अधिकारका लागि आन्दोलनमा उत्रिएका पारलैङ्गिक समुदायका व्यक्तिहरूमाथि प्रहरीले कुटपिट र दुर्व्यवहार गरेको आरोप लागेको छ । आफ्नो हक अधिकारको माग गर्दै काराकोरम राजमार्ग नजिकै भेला भएका उनीहरूले सडक अवरुद्ध गरेर प्रहरीविरुद्ध नाराबाजी गरेका थिए ।

प्रदर्शनकारीहरूका अनुसार प्रहरीले उनीहरूमाथि विभिन्न प्रतिबन्धहरू लगाउने र दुर्व्यवहार गर्ने गरेको छ । प्रहरीले मनोरञ्जनात्मक कार्यक्रमहरू आयोजना गर्न रोक लगाएर आफूहरूको रोजगारीको अवसर खोसेको गुनासो उनीहरूले गरेका छन् ।

दर्शनकारीहरूले अवरोध गरेपछि प्रहरीले उनीहरूलाई तितरबितर पार्न बल प्रयोग गर्नुका साथै लाठीचार्ज गरेको थियो । सो क्रममा भएको झडपमा दुई जना पारलैङ्गिक व्यक्ति र केही प्रहरी कर्मचारी घाइते भएका छन्। घाइतेहरूलाई उपचारका लागि अस्पताल लगिएको छ भने प्रहरीले केही प्रदर्शनकारीहरूलाई पक्राउ गरी नगर प्रहरी चौकीमा राखेको छ ।