काठमाडौं- अर्जेन्टिनासँगको जलमार्ग सम्झौतामा चीनले आफ्नो प्रभाव बढाउन खोजेको भन्दै अमेरिकी वैदेशिक मामिला समितिका अध्यक्ष ब्रायन मास्टले कडा आपत्ति जनाएका छन् । उनले अमेरिकी विदेशमन्त्री मार्को रुबियोलाई एक पत्र लेख्दै यस विषयमा ध्यानाकर्षण गराएको समाचार एजेन्सी रोयटर्सले जनाएको छ ।

यो विवाद अर्जेन्टिनाको कृषि निर्यातका लागि निकै महत्त्वपूर्ण मानिने पराना नदीको उत्खनन र सञ्चालन गर्ने २५ वर्षे सम्झौतासँग जोडिएको छ । करिब १० अर्ब डलर लगानीको यो ठेक्का प्रक्रियाको अन्तिम चरणमा पुगेको छ ।

ठेक्काको सर्तअनुसार सरकारी स्वामित्वका कम्पनीहरूलाई यसमा सहभागी हुन रोक लगाइएको छ । यसका कारण चिनियाँ सरकारी कम्पनीहरूले सिधै यसमा आवेदन दिन पाएका छैनन् ।

तर, अमेरिकी अधिकारी ब्रायन मास्टले चीनले निजी कम्पनीलाई माध्यम बनाएर यो सर्त छल्न खोजेको आरोप लगाएका छन् । हाल यो ठेक्का पाउने दौडमा बेल्जियमको ‘जान डे नल’ नामक कम्पनी सबैभन्दा अगाडि छ । उक्त कम्पनीसँग आबद्ध अर्जेन्टिनाको ‘सर्विम्याग्नस’ मार्फत चिनियाँ सरकारी कम्पनीहरूसँग गहिरो सम्बन्ध रहेको दाबी मास्टको पत्रमा गरिएको छ ।

यो ठेक्का उक्त कम्पनीलाई दिनु अर्जेन्टिना, अमेरिका र यी दुई देशबीचको सम्बन्धका लागि घातक हुने चेतावनी समेत उनले दिएका छन् । अमेरिकी राष्ट्रपति डोनाल्ड ट्रम्पको प्रशासन अर्जेन्टिनाका राष्ट्रपति हाभियर मिलेईको घनिष्ठ सहयोगी मानिन्छ र उसले ल्याटिन अमेरिकामा चिनियाँ प्रभाव बढ्दै गएकोमा लगातार चिन्ता व्यक्त गर्दै आएको छ ।

अर्कोतर्फ, बेल्जियमको ‘जान डे नल’ र अर्जेन्टिनाको ‘सर्विम्याग्नस’ दुवै कम्पनीले यी आरोपहरूलाई पूर्ण रूपमा झुटो र भ्रामक भनेका छन् । उनीहरूले यो ठेक्का प्रक्रियामा चिनियाँ कम्पनीहरूको कुनै पनि साझेदारी वा संलग्नता नरहेको प्रस्ट पारेका छन् ।

यसैगरी, ब्युनस आयर्सस्थित चिनियाँ दूतावासले पनि यी आरोपहरूको खण्डन गर्दै यसलाई आधारहीन अड्कलबाजी भनेको छ । चिनियाँ दूतावासले अमेरिकाले सुरक्षाको बहाना बनाएर व्यापारलाई राजनीतिकरण गरिरहेको र आफ्ना कम्पनीहरूलाई फाइदा पुर्‍याउन चिनियाँ प्रतिस्पर्धालाई पाखा लगाउन खोजेको आरोप लगाएको छ ।