काठमाडौं– नेपाल चिकित्सक संघले आगामी आर्थिक वर्ष २०८३ ८४ को बजेटमार्फत निजी अस्पतालमा उपचार गराउने बिरामीबाट स्वास्थ्य समता शुल्क शीर्षकमा ३ प्रतिशत कर उठाउने निर्णयप्रति गम्भीर आपत्ति जनाएको छ।

संघले एक विज्ञप्ति जारी गर्दै उक्त निर्णयले उपचारका लागि अस्पताल पुगेका बिरामीमाथि थप आर्थिक भार पर्ने र यसले बिरामी तथा उनका आफन्तमाथि अन्याय हुने जनाएको छ ।

संघका अनुसार विगतमा पनि नेपाल चिकित्सक संघको पहलमा यस्तै प्रकारको कर फिर्ता गरिएको थियो । तर यस वर्ष पुनः त्यही व्यवस्था ल्याइनु दुःखद र खेदजनक रहेको विज्ञप्तिमा उल्लेख गरिएको छ ।

संघले स्वास्थ्य सेवा प्राप्त गर्न आएका बिरामीबाट अतिरिक्त शुल्क असुल्नु उचित नभएको भन्दै सरकारले उक्त निर्णय तत्काल खारेज गर्नुपर्ने माग गरेको छ ।

नेपाल चिकित्सक संघका महासचिव डा.सञ्जीव तिवारीद्वारा हस्ताक्षरित विज्ञप्तिमा भनिएको छ, ‘उक्त निर्णयले बिरामीलाई थप आर्थिक भार पर्न गई अन्याय हुने भएकाले अविलम्ब खारेज गर्न नेपाल चिकित्सक संघ जोडदार माग गर्दछ ।’

संघले स्वास्थ्य सेवामा पहुँच सहज बनाउनेतर्फ सरकार केन्द्रित हुनुपर्ने बताउँदै बिरामीमाथि थप करको भार थोपर्ने नीतिले उपचार सेवाको पहुँचलाई समेत प्रभावित पार्न सक्ने चेतावनी दिएको छ ।