काठमाडौं- अर्थमन्त्री डा. स्वर्णम वाग्लेले आज आर्थिक वर्ष २०८३/८४ को बजेट भाषण गर्दैछन् । बजेट भाषणका बेला प्रधानमन्त्री बालेन्द्र शाह सदनमा उपस्थित हुने भएका छन् । तर उनले बोल्ने कार्यक्रम भने छैन । प्रधानमन्त्रीका सचिवालय सदस्यले दिएको जानकारी अनुसार अहिले प्रधानमन्त्री बालेन सदन पुग्नका लागि तयारी गरिरहेका छन् ।

‘प्रधानमन्त्री कार्यालयबाट सदन जाने तरखरमा प्रधानमन्त्रीज्यू हुनुहुन्छ । आज उहाँ सदनमा उपस्थित हुनुहुन्छ ।’ सचिवालयका एक सदस्यले खबरहबसँग भने, ‘हामीले यसबारे जानकारी गराइसकेका छौँ ।’

सभामुखको सचिवालयका एक सदस्यले पनि प्रधानमन्त्री सदन आउने जानकारी आफूहरुलाई भएको बताए । चैत्र १३ गते प्रधानमन्त्री नियुक्ति भएका वालेन्द्र शाह अहिलेसम्म सदनमा उपस्थित भएर बोलेका छैनन् । उनी राष्ट्रपति रामचन्द्र पौडेलले आर्थिक वर्ष २०८३/८४ को नीति तथा कार्यक्रम प्रस्तुत गर्दा पनि केही समय सदन बसेर निस्किएका थिए ।

त्यसपछाडि प्रतिपक्षले बालेन्द्रको सदनमा निरन्तर खोजी गरेपनि उनी उपस्थित भएका थिएनन् । आजको सदनमा भने प्रधानमन्त्री उपस्थित हुने जानकारी गराइएको छ ।