काठमाडौं– कोशी प्रदेशका मुख्यमंत्री हिक्मत कुमार कार्कीले संविधान र सङ्घीयता प्रति विभिन्न कोणबाट भइरहेको आक्रमणको प्रयासलाई सबैले मिलेर निस्तेज गर्नुपर्ने बेला आएको बताएका छन् ।

 १९ औं गणतन्त्र दिवसको अवसरमा विराटनगर स्थित वीरेन्द्र सभागृहमा आयोजित कार्यक्रमलाई सम्बोधन गर्दै मुख्यमंत्री हिक्मत कुमार कार्कीले गणतन्त्रको उपलब्धि जनता सम्म पुर्‍याउन भइरहेको विलम्बका कारण असन्तुष्टि व्यक्त भइरहेको प्रति सजग हुन आग्रह गरे । 

उनले लोकप्रियतावादका नाममा भइरहेका क्रियाकलापले संघिय लोकतान्त्रिक गणतन्त्रमार्फत प्राप्त गरेका उपलब्धिहरू गुम्ने मात्र नभई, मुलुकको स्वतन्त्रता, सार्वभौमसत्ता र अखण्डता नै संकटमा पर्ने तर्फसचेत हुन आग्रह गरे ।

सो कार्यक्रम अघि जिल्ला प्रशासन कार्यालय मोरङ अगाडि बाट निकालिएको झाँकी सहितको र्‍यालीले नगरको विभिन्न भागको परिक्रमा गरेको थियो । 

गणतन्त्र दिवस समारोह समितिले आयोजना गरेको सो कार्यक्रममा कोशी प्रदेशका प्रदेश प्रमुख, सभामुख, मन्त्रीहरू, उच्चपदस्थ कर्मचारीहरू, सुरक्षा निकायका प्रमुखहरू र नागरिक समाजका प्रतिनिधिहरूको सहभागिता रहेको थियो ।