काठमाडौं –  चलचित्र ‘लभ डायरिज’ ले फागुन २ गतेलाई रिलिज मिति फाइनल गरेको छ । सुशील श्रेष्ठ स्टारर उक्त चलचित्र भ्यालेनटाइन डेका अवसर पारेर रिलिज हुने भएको हो ।

निर्माण टिमका अनुसार आइतबार चलचित्रको छायांकन पनि सकिएको छ । राजधानीको होटल हायात परिसरमा अन्तिम गीतको छायांकन खिचिएको निर्माण टिमले जानकारी दियो । उक्त गीतमा अर्जुन पोखरेलको शब्द तथा संगीत रहेको छ भने दुर्गा खरेल, सुरेश लामा र कमला घिमिरेको स्वर छ ।

यस्तै गीतमा सुशील, रुविना थापा, विश्वजित रिमालसँगै प्रिष्मा/प्रिन्सी खतिवडा र कमला घिमिरेलाई देख्न सकिनेछ । टिकटक भाइरल प्रिष्मा/प्रिन्सीलाई पहिलोपटक चलचित्रको गीतमा देख्न पाइनेछ ।

सौरभ चौधरीले निर्देशन गरेको यो चलचित्रमा सुशील, रुविना र विश्वजितले मुख्य भूमिका निर्वाह गरेका छन् । चलचित्रको ‘सुन्यौ कि सुनेनौ’ बोलको रोमान्टिक गीत यसअघि नै रिलिज गरिएको थियो ।

चलचित्रलाई सञ्जय लामाले खिचेका हुन् भने मिलन श्रेष्ठले सम्पादन गरेका हुन् । यस्तै चलचित्रमा मधु बास्तोलाको कथा/पटकथा रहेको छ । चलचित्रमा लगानी भने विनोद सापकोटाको रहेको छ ।