काठमाडौं- अमेरिकी राष्ट्रपति डोनाल्ड ट्रम्पले ओमनलाई ध्वस्त पार्ने धम्की दिएपछि इरानले क्रुद्ध प्रतिक्रिया दिएको छ । राष्ट्रपति ट्रम्पले ध्वस्त पार्ने धम्की दिएपछि इरान ओमनको समर्थनमा उत्रिएको हो ।

इरानी विदेश मन्त्रालयका प्रवक्ता एस्माइल बघेईले बिहीबार विज्ञप्ति जारी गर्दै ‘अमेरिकी अधिकारीको धम्की’ विरुद्ध ओमनप्रति ऐक्यबद्धता जाहेर गरेका हुन् ।

यसअघि राष्ट्रपति ट्रम्पले होर्मुजको जलक्षेत्र कसैले पनि नियन्त्रण गर्न नहुने बताएका थिए । उनले अन्तर्राष्ट्रिय समुद्र भएकाले होर्मुज जलक्षेत्रसँग सीमा जोडिएको ओमनले पनि अरुले गरेजस्तै व्यवहार गर्नुपर्ने अन्यथा ध्वस्त पार्ने धम्की दिएका थिए ।

इरानले ओमनसँग मिलेर होर्मुजको जलक्षेत्रबाट ओहोरदोहोर गर्ने जहाजबाट शुल्क उठाउने तयारी गरिरहेका बेला ट्रम्पको धम्की आएको हो । वर्षौँदेखि आर्थिक र रणनीतिक रुपमा निकट सम्बन्ध रहेको ओमनविरुद्ध राष्ट्रपति ट्रम्पले दिएको धम्कीलाई धेरैले आश्चर्यका रुपमा हेरेका छन् ।