काठमाडौं– भदौ २४ गते भएको तोडफोड र आगजनीको श्रृंखला काठमाडौंको देउवा चोकबाट सुरु भएको तथ्य सार्वजनिक भएको छ । 

मानव अधिकार आयोगको प्रतिवेदनअनुसार निषेधाज्ञा र सुरक्षा आदेशको अवज्ञा गर्दै एक समूहले बिहान करिब ११ बजे तत्कालीन ऊर्जामन्त्रीको घरमा आक्रमण सुरु गरेपछि देशभर हिंसा फैलिएको थियो ।

प्रतिवेदनमा त्यसपछि राजनीतिक दलका कार्यालय, शीर्ष नेताका निवास, सिंहदरबार, सर्वोच्च अदालत, प्रहरी चौकी, सरकारी कार्यालय, व्यापारिक प्रतिष्ठान र निजी सम्पत्तिमाथि तोडफोड, आगजनी तथा लुटपाट भएको उल्लेख छ ।

यसैक्रममा ललितपुरको नख्खु कारागार पनि प्रदर्शनकारीले घेरेका थिए । राष्ट्रिय स्वतन्त्र पार्टीका नेताहरू मनिस झा र हरि ढकालसहितको भीडले  सभापति रवि लामिछानेलाई कारागारबाट बाहिर निकालिएको र त्यसपछि अन्य बन्दीसमेत बाहिर निस्किएको प्रतिवेदनमा उल्लेख छ ।

रवि लामिछाने बाहिरिएको समाचार फैलिएपछि देशभरका कारागार र बाल सुधार केन्द्रमा तनाव फैलिएको तथा भाग्ने प्रयासका क्रममा प्रहरीसँग झडप हुँदा तीन सुरक्षाकर्मीको मृत्यु र करिब २५० जना घाइते भएको उल्लेख गरिएको छ ।

 त्यसपछि विभिन्न कारागारमा गोली चल्दा १० जना बालबन्दी तथा कैदीबन्दीको मृत्यु भएको प्रतिवेदनमा जनाइएको छ ।