चितवन – नेपाल लेयर्स कुखुरापालक संघले अण्डाको नयाँ समर्थन मूल्य सार्वजनिक गरेको छ । संघको बैठकले नयाँ मूल्य निर्धारण गर्ने निर्णय गरेको हो ।

संघले चितवनलाई आधार क्षेत्र मानेर नयाँ मूल्य तय गरेको जनाएको छ । निर्धारण गरिएको मूल्य जेठ १२ गतेदेखि लागू हुने संघका सचिव मदन पोखरेलले जानकारी दिएका छन् ।

नयाँ मूल्यसूची अनुसार एक्सएल अण्डाको प्रतिक्रेट मूल्य ५ सय ४५ रुपैयाँ कायम गरिएको छ । यस्तै ठूलो अण्डाको मूल्य ५ सय ३० रुपैयाँ तोकिएको छ भने मध्यम अण्डाको मूल्य ५ सय रुपैयाँ निर्धारण गरिएको छ । सानो अण्डाको प्रतिक्रेट मूल्य ४ सय रुपैयाँ कायम गरिएको संघले जनाएको छ ।

यसैगरी उपभोक्ताका लागि प्रतिगोटा अण्डाको खुद्रा मूल्य २५ रुपैयाँ तोकिएको छ । पछिल्लो समय उत्पादन लागत, दानाको मूल्य तथा बजार अवस्थालाई ध्यानमा राख्दै नयाँ मूल्य समायोजन गरिएको व्यवसायीहरूले बताएका छन् ।

संघले देशभरका सम्पूर्ण व्यवसायी तथा सरोकारवालाहरूलाई तोकिएकै मूल्यमा कारोबार गर्न अनुरोध गरेको छ । बजारमा अस्वाभाविक मूल्यवृद्धि नगर्न तथा उपभोक्तालाई सहज रूपमा अण्डा उपलब्ध गराउन पनि संघले आग्रह गरेको छ ।

पछिल्ला केही महिनायता अण्डाको मूल्यमा उतारचढाव देखिँदै आएको अवस्थामा संघले नयाँ समर्थन मूल्य तोकेपछि बजारमा केही स्थिरता आउने अपेक्षा गरिएको छ ।