काठमाडौं– भारत काभा महिला भलिबल च्याम्पियनसिपको सेमिफाइनलमा प्रवेश गरेको छ । 

त्रिपुरेश्वरस्थित राष्ट्रिय खेलकुद परिषद्को कभर्ड हलमा सोमबार भएको समूह चरणको अन्तिम खेलमा किर्गिस्तानलाई ३–० को सेटमा पराजित गर्दै समूह विजेता बन्दै भारत सेमिफाइनलमा प्रवेश गरेको हो । 

खेलमा भारत २५–१४, २६–२४ र २५–१३ ले विजयी भयो । समूह ए मा भारतसँगै नेपाल पनि सेमिफाइनलमा प्रवेश गरिसकेको छ । पराजित किर्गिस्तान प्रतियोगिताबाट बाहिरिएको छ ।

त्यस्तै सोमबार भएको पहिलो खेलमा बङ्गलादेशलाई ३–० को सोझो सेटमा पराजित गर्दै  श्रीलङ्काले सान्त्वना जित निकाल्यो । 

समूह चरणको अन्तिम खेलमा श्रीलङ्काले २५–१९, २५–९ र २५–१३ को जित निकालेको हो । समूह बी बाट कजाख्स्तान र इरान सेमिफाइनल प्रवेश गरिसकेका छन् । 

चार टीमबीच वर्गीकरण राउन्ड पछि जेठ १४ गते बिहीबार सेमिफाइनल खेल हुने भलिबल संघले जनाएको छ । फाइनल खेल भने जेठ १५ गते शुक्रबार हुने छ ।