काठमाडौँ – भारतमा आयोजना हुने ‘अल इन्डिया गोल्ड कप’ क्रिकेट प्रतियोगिता खेल्ने नेपाल ‘ए’ क्रिकेट टिम घोषणा भएको छ। नेपाल क्रिकेट सङ्घ (क्यान) ले आइतबार अनिल शाहको कप्तानीमा नेपाल ए टिम घोषणा गरेको हो ।

१४ सदस्यीय नेपाली टोलीमा युवा र राष्ट्रिय टोलीका अनुभवी खेलाडी समेटिएका छन् ।

नेपाल ए टिममा मयन यादव, तिर्थराज दास, देव खनाल, रसिद खान, बसिर अहमद, नारायण जोशी, आकाश चन्द, हेमन्त धामी, पवन सर्राफ, दीपक डुम्रे, युवराज खत्री, बिपिन खत्री, ललित राजबंशी र अर्जुन कुमालले स्थान पाएका हुन्।

प्रतियोगिताको समूह चरणमा नेपाल ‘ए’ ले भारतका तीनवटा प्रान्तीय टोलीसँग प्रतिस्पर्धा गर्नेछ। तालिका अनुसार नेपालले पहिलो खेल जेठ १६ गते केरलासँग खेल्नेछ । जेठ १७ गते दोस्रो खेल गोवा र जेठ १९ गते तेस्रो खेल ओडिसासँग खेल्दैछ ।

समूह चरणको खेल सकिएपछि त्यसको नतिजाका आधारमा जेठ २१ गते क्वाटरफाइनल, जेठ २३ गते सेमिफाइनल र जेठ २४ गते फाइनल खेल हुने छ।