महोत्तरी – महोत्तरीको बर्दिबासमा आज जगन्नाथ रथयात्रा उत्सव मनाइएको छ । अन्तरराष्ट्रिय कृष्ण भावनामृत सङ्घ (इस्कोन) बर्दिबासको आयोजनामा जगन्नाथ रथयात्राको धार्मिक उत्सव मनाइएको हो ।

इस्कोन गौडीय वैष्णव परम्पराको हिन्दू धार्मिक संस्था मानिन्छ । हिन्दू परम्पराका आराध्यदेव श्रीकृष्ण भक्ति परम्पराको यो संस्थालाई ‘हरे कृष्ण’ पनि भनिन्छ । संसारभरि भगवान् जगन्नाथको कीर्ति र मानव कल्याणको मार्गबारे सचेतना बढाउँदै अध्यात्मतिर आममानिसलाई अभिप्रेरित गराउन जगन्नाथ रथयात्रा आयोजना गरिएको इस्कोन बर्दिबास शाखाका प्रमुख सन्त गोपाल दासले बताए।

बर्दिबास नगर क्षेत्रका–१, २ र १४ वडाका बस्तीबस्तीमा रथयात्रा पुगेको छ । महोत्तरी–१ का प्रतिनिधिसभा सदस्य प्रमोदकुमार महतो र बर्दिबास नगरप्रमुख प्रल्हदकुमार क्षेत्रीले जगन्नाथ रथ यात्राको डोरी तानेर शुभारम्भ गर्नुभयो । रथयात्रामा टाढाटाढाबाट हजारौँ श्रद्धालु सहभागी भएका छन् ।

सन् १९६६ को जुलाई १३ का दिन ए।सी। भक्तिवेदान्त स्वामी प्रभुपादले अमेरिकाको न्युयोर्कमा स्थापना गर्नुभएको इस्कोन अभियान अब संसारभरिका सबै मुलुकमा पुगेको बर्दिबास शाखाले जनाएको छ । भाइचारा, विश्व वन्धुत्व र मानव कल्याण नै इस्कोनको उद्देश्य र लक्ष भएको बर्दिबास शाखाका योगी सन्त श्रीराम दास बताउँछन् ।

यसै मानव कल्याणको कामनासहित सनातन हिन्दू दर्शनबारे जागरणका लागि बर्दिबासमा जगन्नाथ रथयात्रा गरिएको इस्कोन बर्दिबासका प्रमुख गोपाल दासले स्पष्ट पारे । जगन्नाथ रथयात्रामा देवेश्वर श्रीकृष्ण, बलदेव र सुभद्राका प्रतिमा रथारोहण गराई भक्तहरूले तान्ने चलन छ ।

भारतको उडिसामा हुने जगन्नाथ रथयात्रालाई सबै ठाउँका भक्तले अनुभूति गर्न सकुन् भन्ने उद्देश्यसाथ यो यात्रा स्वामी प्रभुपादले सर्वप्रथम अमेरिकाको न्युयोर्कबाट सुरु गराउनुभएको हो । रथयात्रा बर्दिबासमा हुँदा महोत्तरीका अतिरिक्त धनुषा, सर्लाही र सिन्धुलीका श्रद्धालु सहभागी भएका थिए ।