काठमाडौं- नेपालको सूचना तथा सञ्चार प्रविधि क्षेत्रको छाता संगठन, कम्युटर एसोसिएसन नेपाल (क्यान) को कार्यवाहक अध्यक्षको जिम्मेवारी वरिष्ठ उपाध्यक्ष चिरञ्जीवी अधिकारीले सम्हालेका छन् । महासंघको इतिहासमै पहिलो महिला अध्यक्ष बनेर कीर्तिमान राखेकी सुनैना घिमिरे पाण्डेले व्यक्तिगत कारण देखाउँदै आफ्नो पदबाट राजीनामा दिएपछि अधिकारीले यो जिम्मेवारी पाएका हुन् ।

विगत २१ वर्षभन्दा लामो समयदेखि क्यान महासंघको विभिन्न सांगठनिक संरचनामा रहेर स्थानीय, प्रादेशिक र राष्ट्रिय समितिहरूमा कुशलतापूर्वक जिम्मेवारी निभाइसकेका अधिकारी नेपालको स्थापित साइबर सुरक्षा अभियन्ता तथा विशेषज्ञ हुन् ।

प्रतिष्ठित ‘राष्ट्रिय आइसिटी एक्सीलेन्स अवार्ड २०२४’ बाट समेत सम्मानित अधिकारीले एनपीसीईआरटी र कम्प्युटर सेक्युरिटी रिसर्च एण्ड इनोभेसन सेन्टरको संस्थापक अध्यक्ष तथा वान कभर प्रालिको सीईओका रूपमा प्राविधिक क्षेत्रमा विशिष्ट योगदान पुर्‍याएका छन् ।

तीव्र गतिमा विकास भइरहेको डिजिटल इकोसिस्टम, स्वचालन (अटोमेसन) र डिजिटल रुपान्तरणको वर्तमान अवस्थामा अधिकारीले नेतृत्व सम्हालेका हुन् । कार्यवाहक अध्यक्ष अधिकारीले पुराना कानुनी संरचनाको परिमार्जन, आर्टिफिसियल इन्टेलिजेन्स (एआई) र ई-गभर्नन्स ब्लुप्रिन्टको कार्यान्वयन, मौद्रिक तथा बैंकिङ सुरक्षा प्रणालीको सुदृढीकरण र डाटा सार्वभौमिकतालाई आफ्नो मुख्य प्राथमिकतामा राखेका छन् ।