काठमाडौं- भारतमा भाइरल भइरहेकाे ककरोच जनता पार्टीलाई काउन्टर दिन ओगी जनता पार्टीको ट्रेन्डिङ सुरु भएको छ । भारतमा निकै लोकप्रिय फ्रान्सेली कार्टुन ‘ओगी एन्ड द ककरोचेज’ बाट ओगी जनता पार्टीको नाम जुराइएको भारतीय सञ्चार माध्यमले जनाएका छन् ।

स्थापना भएको केही दिनभित्रै ककरोच जनता पार्टीको फलोअर्स करिब २ करोड १५ लाख पुगेका छन् । सामाजिक सञ्जालमा यो पार्टीले कैयौँ ठूला राजनीतिक दलहरूलाई समेत पछाडि छाडिदिएको छ । यस पार्टीको घोषणापत्र र पोस्टहरूलाई लिएर इन्टरनेटमा व्यापक चर्चा भइरहेकै बेला अहिले फेरि अर्को नयाँ पार्टी ‘ओगी जनता पार्टी’ तीव्र रूपमा भाइरल भइरहेको हो ।

ककरोच जनता पार्टी भाइरल भएको केही दिनमै इन्स्टाग्राम र अन्य सामाजिक सञ्जालहरूमा ओगी जनता पार्टीका पोस्टहरू देखिन थालेका हुन्।

ओगी जनता पार्टीले सामाजिक सञ्जालमा ‘जतिसुकै ठूलो र जुनसुकै प्रजातिको ककरोच भए पनि त्यसलाई नष्ट पार्ने’ आफ्नो मिसन रहेको उल्लेख गरेको छ । यो पार्टीले प्रचार पोस्टरमा कार्टुन पात्र ओगीलाई सेतो कुर्ता-पजामा लगाएर जनावरहरूसँग बसेको देखाइएको छ।