काठमाडौं– नेपाली कांग्रेसका युवा नेता गगन थापाले १७ औं पटक अनसनमा बसेका डा. गोबिन्द केसीको जीवनरक्षा गर्न सरकारलाई खबरदारी गरेका छन् ।

उनले सामाजिक सञ्जाल फेसबुकमा डा. गोविन्द केसीको माग सम्बोधन गर्नुपर्ने र उनको जीवन रक्षा गर्नुपर्ने जनाएका छन् ।

उनले लेखेका छन्– डा.गोविन्द केसीको संघर्ष न उहाँको लागि हो न उहाँको आफन्तका लागि ! यो संघर्ष तपाईं हाम्रा लागि हो,आम नेपालीको गुणस्तरीय स्वास्थ्यका लागि हो । सत्याग्रहलाई बेवास्ता गरिरहनुभएको प्रधानमन्त्रीज्यू लाई डा.केसीको अनशनको बारेमा चिच्याएर भनौँ, डा.केसीको माग अविलम्ब सम्बोधन गर र उनको जीवन रक्षा गर !

डा. केसीको स्वास्थ्य अवस्था नाजुक बन्दै गएको भन्दै डडेल्धुरा अस्पतालले आजै विज्ञप्ति जारी गर्दै उनलाई सुरक्षित स्थानमा सार्न आग्रह गरेको छ । डा. केसीको आन्दोलनमा ऐक्यवद्धता जनाउँदै नागरिक समाजले समेत दिनहु आन्दोलन गर्दै आएका छन् ।

यसैबीच, नेपाल चिकित्सक संघले पनि डा. केसीको स्वास्थ्य अवस्था नाजूक भएकोप्रति ध्यानाकर्षण भएको जनाएको छ । संघले विज्ञप्ति जारी गर्दै नेपाल सरकार र सरोकारवाला निकायले डा. केसीसँग यथाशीघ्र छलफल गरी जायज माग सम्बोधन गर्न आग्रह गरेको छ ।
डा. केसीका माग समयमै सम्बोधन नगरिए डा. केसीको जीवन रक्षाका लागि कडा कदम चाल्ने चेतावनी दिएको छ ।