काठमाडौं – नेपाली फिल्महरू बक्स अफिसमा लगातर फ्लप भइरहेको अवस्थामा शुक्रबारबाट प्रदर्शनमा आएका ‘काजी’ र ‘मितज्यू’को बुकिङ पनि कमजोर देखिएको छ ।

प्रदर्शनको पहिलो दिन शुक्रबार ‘काजी’ले ९० र ‘मितज्यू’ले १२० भन्दा बढी शो पाएका छन् ।

तर, दुवै फिल्मको बुकिङ कमजोर देखिएको छ । दुवै फिल्मको बहुसंख्य शो खाली छन् ।

शुक्रबार दिउँसोसम्मको हलमा दर्शकको चाप हेर्दा यी दुवै फिल्मको प्रचार सामाग्रीले आकर्षण गर्न नसकेको देखिन्छ ।

अब यी फिल्महरूको व्यापार माउथ पब्लिसिटीमा निर्भर हुने देखिन्छ । आजका दर्शकबाट सकारात्मक वर्ड अफ माउथले पाएका अवस्थामा यी दुवै फिल्मको व्यापार राम्रो हुने देखिन्छ ।

लक्ष्मण रिजाल निर्देशित फिल्म ‘काजी’को शीर्ष भूमिका नायक विपिन कार्की र नायिका केकी अधिकारी शीर्ष भूमिकामा छन् ।

‘मितज्यू’ नायिका तेरिया मगरको डेब्यू फिल्म हो । यस फिल्मका नायकहरू सौगात मल्ल र दयाहाङ राई हुन् ।