बेइजिङ- आफूलाई विश्व शक्तिको केन्द्रमा उभ्याउने कोसिस गरिरहेका चिनियाँ राष्ट्रपति सी चिनफिङ आगामी हप्ता उत्तर कोरिया भ्रमणमा जाने सम्भावना रहेको छ ।

यो कुराको खुलासा दक्षिण कोरियाली समाचार एजेन्सी योन्हापले गरेको छ। योन्हापले दक्षिण कोरियाली सरकारका उच्च स्रोतलाई उद्धृत गर्दै लेखेको समाचार अनुसार राष्ट्रपति शीको भ्रमण निकट भविष्यमा हुन लागेको हो । योन्हापका अनुसार भ्रमण सम्भवतः अर्को हप्ता, यसै महिनाको अन्त्यतिर वा आगामी महिनाको सुरुमै हुन सक्ने बताइएको छ ।

रिपोर्टमा हालै मात्र चिनियाँ राष्ट्रपतिको सुरक्षा टोली र औपचारिक कर्मचारीहरूको टोली प्योङयाङ गएको उल्लेख छ। यस भ्रमणले चीन र उत्तर कोरियाबीचको सम्बन्ध थप घनिष्ठ बनाउने अपेक्षा गरिएको छ ।

भ्रमणसम्बन्धी प्रश्नमा चिनियाँ विदेश मन्त्रालयका प्रवक्ता गुओ जियाकुनले हाललाई ‘भन्न सकिने केही छैन’ भनेर जवाफ दिएका छन् । तर उनले दुई देशबीच राम्रा मित्र र निकट छिमेकी रहेको र निरन्तर मित्रवत् आदानप्रदान भइरहेको बताए ।

कोरियाली प्रायद्वीपको परमाणु निशस्त्रीकरण विषयमा चीनको नीति निरन्तर र स्थिर रहेको तथा राजनीतिक समाधानमा आफ्नै तरिकाले रचनात्मक भूमिका खेल्ने उनले बताए ।

यो सम्भावित भ्रमण चीनमा अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनको भ्रमणपछि आएको हो । यसअघि गत महिना चिनियाँ विदेशमन्त्री वाङ यीले उत्तर कोरिया भ्रमण गरेर नेता किम जोङ उनसँग भेटेका थिए ।

सी चिनफिङको यो सम्भावित भ्रमण २०१९ पछिको पहिलो उत्तर कोरिया भ्रमण हुन सक्नेछ ।