काठमाडौं – फिल्म ‘लालीबजार’ अदालतको आदेशबाट प्रदर्शनमा आएसँगै बक्स अफिसमा राम्रो कलेक्सन गरिरहेको छ ।

अहिले फिल्मका शीर्ष कलाकारहरू दर्शक भेट्नलाई धरान पुगेका छन् । धरानकै मेयर बनेर चर्चामा आएर अहिले सांसद बनेका श्रम संस्कृति पार्टीका अध्यक्ष हर्क साम्पाङले यो फिल्म प्रदर्शनमा ल्याउनु नहुने बताएका थिए ।

कानुनी प्रक्रियामा रहँदा हर्कले यो फिल्म रोक्नुपर्ने सार्वजनिक धारणा राख्दै आएको थिए ।

फिल्म प्रदर्शनमा आएपछि उनले सामाजिक सञ्जालमा लेखेका थिए, ‘लालीबजार नामक विवादित फिल्म रोक्नुपर्छ है । त्यो फिल्मले सामाजिक अपमान गरेको भन्ने आएको छ ।’

हर्कको उक्त अभिव्यक्तिले निर्माण टिम रुष्ट रहँदै आएको थियो । निराधार आरोप लगाएको उनीहरूको आशय थियो ।

अहिले उक्त फिल्म हर्ककै गृह शहरमा प्रदर्शन छ । उनले रोक्नुपर्छ भनेको फिल्म उनको स्थानमा प्रदर्शनमा आएको छ र निर्माण टोली पनि उतै छ ।

सोहीकारण हर्कलाई कटाक्ष गर्दै स्वस्तिमाले सामाजिक सञ्जालमा लेखेकी छन्, ‘हर्क साम्पाङ ज्यूको शहर धरानमा ‘लालीबजार’ टिम । धरानमा लालीबजार प्रदर्शन भइरहेको छ। यदि हेर्नुभएको छैन भने हेरेर प्रतिक्रिया दिनुहोला है ।’