काठमाडौँ – फिफा विश्वकप २०२६ मा देखिने अधिकांश उत्कृष्ट खेलाडी युरोपेली क्लबमा व्यावसायिक फुटबल खेल्छन् ।

फुटबल प्रशंसकका लागि रोमाञ्चक खेल हेर्न पाउनु खुसीको कुरा भए पनि, विश्वकपको मुखमा कतिपय खेलाडी गम्भीर चोटको सिकार छन् ।

यतिबेला सबैभन्दा ठूलो चासो र चिन्ता स्पेनका विङ्गर लामिन यमललाई लिएर भइरहेको छ । १८ वर्षीय बार्सिलोनाका यी स्टार खेलाडी यतिबेला विश्वकै उत्कृष्ट खेलाडीमध्ये एक हुन् । उनलाई विश्वकपमा हेर्नका लागि धेरै प्रशंसक उत्साहित छन् ।

यो विश्वकपमा लियोनल मेसी र क्रिस्टियानो रोनाल्डो जस्ता दिग्गज खेलाडीको उपस्थिति रहने निश्चित छ ।

प्रशंसकका लागि यी दुवै भेट्रान खेलाडी अन्तिम पटक विश्वकपको मञ्चमा सँगै मैदान उत्रिएको हेर्ने यो दुर्लभ अवसर हुनेछ ।

रोनाल्डोले अहिलेसम्म विश्वकप उपाधि जित्न नसकेका कारण यस पटक मेसीको त्यो कीर्तिमानसँग बराबरी गर्न उनी आफ्नो सम्पूर्ण शक्ति लगाउने दाउमा छन् । रोनाल्डोलाई पोर्चुगलको टोली घोषणमा समेटिएको छ । उनी ४१ वर्षको उमेरमा विश्वकप मैदानमा देखिने छन् ।