काठमाडौं– जुवा खालबाट पक्राउ परेका सेनानी (मेजर) राजेन्द्र शाहीलाई नेपाली सेनाले प्रहरीसमक्ष उपस्थित गराएको छ ।

नेपाली सेनाद्वारा प्रधानमन्त्रीको सुरक्षाका लागि खटाइएका शाही कात्तिक १५ गते जुवा खालबाट पक्राउ परेका थिए ।

महानगरीय प्रहरी प्रभाग गोंगबुबाट खटिएको टोलीले शाहीसहित ७ जनालाई पक्राउ गरेको थियो ।

प्रहरीको टोलीले शाही समेत सहभागी जुवाको खालबाट १ लाख ५९ हजार रुपैयाँ बरामद गरेको थियो ।

जुवा खालबाट पक्राउ परेका शाहीलाई प्रहरीले सेनाको जिम्मा लगाएको थियो ।

शाहीमाथि थप अनुसन्धानका लागि भन्दै प्रहरीले उपस्थित गराइदिन भन्दै सेनालाई पत्राचार गरेको थियो ।

प्रहरीको पत्रअनुसार शाहीलाई अनुसन्धानका लागि महानगरीय प्रहरी परिसर बृत्त महाराजगञ्जमा उपस्थित गराइएको नेपाली सेनाको जनसम्पर्क तथा सूचना निर्देशनालयले जनाएको छ ।

सेनाले गल्ती गर्ने जुसुकैलाई पनि कानूनबमोजि कडा कारबाही गरिने पनि जनाएको छ ।