काठमाडौं– सत्तारुढ नेपाल कम्युनिस्ट पार्टी नेकपाले बाग्लुङ–२ को प्रदेश सभा (ख) मा बागी उम्मेदवारी दिएका शेरमान घर्तीलाई उम्मेदवारी फिर्ताका लागि हेलिकोप्टरबाट सदरमुकाम लगेको छ ।

घर्तीलाई हेलिकोप्टर चार्टर गरी मुख्य निर्वाचन अधिकृतको कार्यालय लगिए पनि उम्मेदवारी फिर्ता गर्न भने नेकपा सफल भएन ।

बुर्तिमावाङस्थित होटल दरबारबाट हेलिकोप्टरमा राखेर घर्तीलाई सदरमुकाम लगिएको हो । तर, उम्मेवादरी फिर्ताका लागि दिइएको निर्धारित समय भित्र निर्वाचन अधिकृतको कार्यालयमा पुग्न नसक्दा घर्तीको उम्मेदवारी फिर्ता हुन सकेन ।

उम्मेदवारी फिर्ता लिने समय दिउँसो १ बजेसम्म थियो । बागी उम्मेदवार घर्ती भने १ बजेर २० मिनेटमा निर्वाचन अधिकृतको कार्यालय पुगेका थिए ।

बाग्लुङ २ (ख) को उपनिर्वाचनमा नेकपाको समर्थनमा राष्ट्रिय जनमोर्चाले खिमविक्रम शाहीलाई प्रदेशसभा सदस्य उम्मेदवार बनाएको छ ।

घर्तीको उम्मेदवारी फिर्ता नभएसँगै चुनावी गठबन्धन गरेका नेकपा र जनमोर्चाबीच खैलाबैला मच्चिएको छ । उपनिर्वाचनमा जनमोर्चालाई उक्त क्षेत्र छाड्ने केन्द्रीय तहमा भएको सहमतिपछि नेकपाका स्थानीय कार्यकर्ता भने आक्रोसित बनेका थिए ।