काठमाडौं । एक अध्ययनले अस्ट्रेलियामा बसोबास गर्ने नेपालीहरूको संख्या उल्लेखनीय रूपमा बढ्दै गएको देखाएको छ । द इन्स्टिच्युट अफ इन्टिग्रेटेड डेभलपमेन्ट स्टडिज् (आईआईडीएस) ले मंगलबार राजधानीमा सार्वजनिक गरेको ‘नेपाली डायस्पोरा इन अस्ट्रेलिया’ प्रतिवेदन अनुसार सन् २०२५ सम्म त्यहाँ नेपालीहरूको संख्या दुई लाख १३ हजार ५८० पुगेको छ । यो अध्ययन काठमाडौंस्थित अस्ट्रेलियन दूतावासको सहयोगमा तयार पारिएको हो ।

प्रतिवेदनले पछिल्ला वर्षहरूमा अस्ट्रेलियामा नेपाली समुदाय तीव्र गतिमा विस्तार भइरहेको देखाएको छ । सन् २०२१ को जनगणनामा एक लाख २२ हजार ५०७ नेपाली रहेको उल्लेख भए पनि त्यसपछिका वर्षहरूमा संख्या झन् बढेको छ । सन् २०१४ को तुलनामा सन् २०२५ सम्म आइपुग्दा नेपाली डायस्पोराको आकार पाँच गुणाले वृद्धि भएको देखिन्छ ।

अध्ययनअनुसार सन् २०२५ मा अस्ट्रेलियाको कुल जनसंख्यामा नेपालीहरूको हिस्सा ०.८ प्रतिशत पुगेको छ, जुन सन् २०१५ मा ०.२ प्रतिशत मात्र थियो ।

यस अध्ययनका लागि अस्ट्रेलियामा रहेका एक हजार ८९ नेपालीसँग सर्वेक्षण गरिएको थियो । सहभागीमध्ये ६१.१६ प्रतिशतले उच्च शिक्षाका लागि अस्ट्रेलिया आएको बताएका छन् । उनीहरू प्रायः स्वास्थ्य सेवा, आईटी, आतिथ्य, इन्जिनियरिङ, वित्तीय तथा व्यावसायिक क्षेत्रमा संलग्न रहेको प्रतिवेदनमा उल्लेख छ ।

आयतर्फ हेर्दा, ४५.२७ प्रतिशत सहभागीले वार्षिक ६५ हजारदेखि एक लाख २० हजार अस्ट्रेलियन डलरसम्म आम्दानी गर्ने बताएका छन् भने औसत वार्षिक आम्दानी ७७ हजार ३९ अस्ट्रेलियन डलर रहेको उल्लेख गरिएको छ ।

लगानीतर्फ, ३४.९९ प्रतिशतले औपचारिक रूपमा विभिन्न क्षेत्रमा लगानी गरेको बताएका छन् । तीमध्ये ५१.१८ प्रतिशतले अस्ट्रेलियामै मात्र लगानी गरेको जनाएका छन् भने २२.५७ प्रतिशतले नेपालमा मात्रै लगानी गरेको बताएका छन् ।

प्रतिवेदनले विदेशमा रहेका नेपालीहरूको आफ्ना परिवारसँगको सम्बन्ध अझै मजबुत रहेको पनि देखाएको छ । ५०.२७ प्रतिशत सहभागीले परिवार वा साथीभाइलाई भेट्न नेपाल आउने गरेका छन् । यस्तै, ३७.७४ प्रतिशतले दुईदेखि तीन वर्षमा एकपटक नेपाल आउने बताएका छन् भने १०.३८ प्रतिशत हरेक वर्ष नेपाल आउने गरेका छन् ।

सर्वेक्षणमा सहभागी ६१.७१ प्रतिशतले अस्ट्रेलियामै बसोबास गर्ने इच्छा व्यक्त गरेका छन् । साथै, ७३.०४ प्रतिशतले दोहोरो नागरिकताले नेपाली पहिचान र आत्मीयता बलियो बनाउने विश्वास व्यक्त गरेका छन् भने ६६.३९ प्रतिशतले यसले नेपालमा थप लगानी आकर्षित गर्ने बताएका छन् ।