काठमाडौं – साहित्यकार झमक घिमिरेको जीवनीमा आधारित फिल्म ‘जीवन काँडा कि फूल’ प्रदर्शनरत छ । फिल्मलाई सिलगुढीका निर्देशक विनोद विष्टले निर्देशन गरेका हुन् ।

पुस्तक ‘जीवन काँँडा कि फूल’ माथि फिल्म बनाउन सकिने देखेकाले नै आफूले फिल्म निर्माण गरेको विष्ट बताउँछन् ।

‘मलाई यदि कुनै विषयवस्तुले छोएन भने त्यसमा फिल्म बनाउनुहुँदैन भन्ने लाग्छ, यो पुस्तकले मेरो मन छोयो, त्यसैले फिल्म बनाएँ,’ निर्देशक विष्ट भन्छन् ।

उनी पत्रिकामा पढेको एउटा लेखका आधारमा पुस्तक कस्तो होला भनेर चासो लागेपछि पुस्तक पढेको बताउँछन् ।

एक स्थानीय पत्रिकामा ‘जीवन काँडा कि फूल’ पढेर झमकलाई भेट्न धनगढी पुगेकोबारे एउटा लेख छापिएको थियो । सो लेख पढेपछि पुस्तक कस्तो रहेछ भन्ने जिज्ञासा लागेर आफूले पनि पुस्तक पढेको विष्ट बताउँछन् ।

पछि साथीहरूले पनि यो कथामा फिल्म बन्छ भन्दै हौसला दिएपछि आफूले फिल्म बनाउने सोच बनाएको विष्ट सुनाउँछन् ।

‘फिल्म बनाउने योजना भएपछि स्किृप्टका लागि पुस्तक २/३ पटक पढेँ, पुस्तकमा भएका मुख्य कुरालाई हाइलाइट गरेँ, ६/७ महिना त स्किृप्टमै लागेको थियो,’ विष्ट सुनाउँछन् ।

‘जीवन काँडा कि फूल’ ले ठूलो दर्शक समूहबाट खासै चर्चा नपाए पनि हेरेका दर्शकले भने फिल्म मन परेको प्रतिक्रिया दिएका छन् । खुट्टाले लेखेर विश्वचर्चित बनेकी झमक घिमिरे शारीरिक रुपमा अशक्त भएर पनि कसरी चर्चित बनिन् भन्ने कथा फिल्ममा देख्न सकिन्छ ।

यसअघि विष्टले सङ्ग्राम, म कसरी भनौँ र प्रेम प्रतीक्षा गरी तीन फिल्म निर्देशन गरेका थिए । ‘जीवन काँडा कि फूल’ ले विष्टलाई थप चर्चित बनाइदिएको छ ।

फिल्ममा अवस्था थापाले बाल्यकालकी झमक घिमिरेको भूमिका निभाएकी छिन् भने काठमाडौंकी रोजिता बुद्धाचार्यले ठूली भएपछिकी झमक घिमिरेको भूमिका निभाएकी छिन् ।

यस्तै फिल्ममा सारिका घिमिरे, किसन सुनार, उमा गिरी, मेनुका प्रधान लगायतले समेत अभिनय गरेका छन् । फिल्म हलमा हालै रिलिज भए पनि च्यारिटी शो, स्कूलहरूमा भने प्रदर्शन हुँदै आएको थियो ।